اسمح لقلبى ينحنى
ويبوس على الإيد اللى عدت
فوق جدار الخوف
اتسلقت من فوق جبال الوهم
تفتح طريق الشهدا للجنة
مين اللى علا جبال الوهم قدامنا
اسمح لعقلى يندهش
يسأل كما سأل الخليل ربه
ينزل على قلبى الصغير
ألف حاجة تطمنه
إن الشباب اللى بنوا هرمك
هو الشباب اللى عبر شطك
هو الشباب اللى بيرفع فى الميدان
حلمه وحلمك
اسمح لأهل العزة يرتاحوا
تهدا ضمايرهم
إن الطريق اللى اختاروه
كان الطريق الصح
اسمح لناس طبعوا العلاقات
باعوا الضمير بالدولار
والين والعمولات
اسمح لهم يا سيدى
يتخندقوا ويتشرنقوا
يدعوا أراضى المولى تبلعهم
اسمح لام شهيدنا تتوضا
تصلى ركعتين لله
تحمد وتدعى ربنا يبارك
يزرع شهيدك فوق رمال سينا
تطرح ضماير فوق ميادينك
ويقوى عزم الشباب
تسلم سواعدهم
اسمح لنا كلنا
نرفع رءوسنا لفوق
اسمح لنا وانطلق
عدى دور ورا دور
انزع صوارى العلم