بانوراما مصرية

يارب ارحمنا واهدينــــــــا ونجينا من المحنــــــــــــة
حا نحرق مصر بإيدينـــــــا ونار الشر تلفحنــــــــــــا
ولما نفوق من الغمـــــــــة حانلقى نفسنا رحنـــــــــا
ونتقاتل ف بعضـينـــــــــــا ولا واحد حايصلحنــــــــا
طابور خــــــامس بيتحرك دميم الوجه والسحنـــــــة
بيفرح لمـــــــــــــــــا نتألم ويسرق منا أفراحنـــــــــا
ويدبحنـــــــــــــا على قبله ونتشاهد على أرواحنـــــا
شقيقنا وجارنــــا متربص أوام عاوز يطيحنــــــــــــا
يضخ فلــوس ومش لاحق لمين عاوز يسوحنـــــــــا
بيكره مصر من قلبـــــــــه وأولادنا الصغار وإحنـــــا
ويضحك ضحكتــــه صفرا ويتلون ويمدحنـــــــــــــــا
وينشر فتنته بينـــــــــــــــا ونقتل بعض بسلاحنـــــــا
وياما منه حذرنـــــــــــــــا وصرخنا وصيحنــــــــــــا
مفيش واحد سمع كلمـــــة وخد بيها وريحنـــــــــــــا
وناس ماشيين ف وسطينا بترصدنا وتلمحنـــــــــــــا
وبتربط وبتـــــــــــــــخطط عشان عالأرض تطرحنـــا
ونتقسم ونتشــــــــــــــــرد وتتمايل على نواحنـــــــــا
وتكسر مصر والثـــــــورة وتكسر إيدنا وجناحنــــــــا
ومين تار الشهيد يــــــاخد ومين حايحس بجراحنــــا
يا رب الرحمــــة من عندك ما تخذلناش وسامحنــــــا