فى الميدان

فى الميدان.. فاكر مكانى
والإيمان سندى وأمانى
لما تبقا بايع حياتك
علشان هتحيى حد تاني
علشان بلادك تِحيا تاني
انا مش هألف ولا أقول أغاني
كل الى شفته , شفته بعينايا
والى سمعته سمعته بوداني

فى الميدان.. الراجل يبان
الميدان.. مفيهوش جبان

الكل قادر يفدى بالدم الرسالة
وان قالوا جاسوسية وان قالو عِمالة
راح هنكون يا بلادنا فداكى
قال ايه قالو بتوع كنتاكى

فى الميدان الأرض هى السرير
والرصيف هوا المخدة
فى الميدان الناس كتير
فَ البرد منــّا خاف وعدّا
والناس بقوة مستعدة
تفضل تنام كدا عالرصيف
لحد ما طلبهم يكون
و لأن مطلبهم شَريف
مكانش ضعف ولاكانش ردّة

أول ما توصل
بتلاقى لجنة
ماتخافش منها.. هتفتشك
وبالبطاقة.. تدخلك
مسلم هتدخل
ومسيحى يدخل
ولا حاجة بتفرق مابينا
قالك ما بينهم شِبه فتنه
طب ييجو ويشوفو وقت الصلااااة
ان صلّى المسيحى.. المسلم حَماه
وفى الميدان
أشكال وألوان

فيه الجديد
فيه اللى بايت من زمان

هتلاقى ليبرالى
اشتراكى
وتلاقى أخوان

حتى الجيوب
فيه اللى فاضى
وفيه مليان

أول ما تدخل اعمل جولة
هتحس ان ميدانك دولة

عامل نظافة.. وشغلته مهندس ديكور
هتــــّيف مظاهرة.. فى الأصل كان دوكتور
أصل الميدان مفيهوش مغرور
الكل دايما أيد واحدة
علشان نظام الظلم يغور

فى الحيرة كله يكون حيران
ساعة القلق هتكون قلقان
ساعة الغضب بتكون غضبان

وأكيد تلاقى حد هيطبطب عليك
فى الضعف هتلاقى ألف واحد ياخد ايديك

وساعة الفرح فرحتنا بتهز الجبال
جايين بقا يحاربونا ببغال وبجــِمال

مين الى يقدر على ملايين
حبة حثالة من زبالة المجتمع؟

أمين شرطة؟
بلطجى ماشى ف ايده بلطه؟
عسكرى مالمركزى فاكرنا عملاء من سويسرا ؟؟
دنا كنت اروح واعيش فى مالطة
رافعينلى صورة حسنى وجايين يتمختروا
بالرغم من استفزازهم محدش اتعرضلهم
اتغاظوا بقا وحدفو طوب وحديد.... وازاز علينا يكسروا
وقصاد كل حدفة منهم.. .الله أكبر مننا
مستحيل مأجور وقاتل يغلب أيمانّــا ف قلبنا
مع كل كلمة الله أكبر
قوتنا تكبر
عال خوف بنقدر

والفجر يطلع..
ودا يوم جديد...
يعنى لازم البلطجى ياخدله أجره من جديد..
وعابال ما يرجع عملنا متاريس من حديد..
كل الى يجى مالزباله يبعد بعيد

أصل الميدان..
دولة أمان.. ..
دولة أيمان.......


عال منصة... واقفة أم شهيد بتبكي
بتقولنا راح منى ولدي....
بس انت ولدي, وانتى بنتى , وانت ولدي
لازم تجيبو حق ولدى...
حق بلدي...............
اوعوا فى يوم تستسلموا

تدمع دموع العين..
تطــّفى نار قلبها..
وتسمع صوت ابنها.. .بيقولها
فى الجنة.. أنا
ضاع الألم واليوم هنا
يا ريتكو كنتو تستشهدوا
فى الجنة مش راح تتألموا....
وأما غار.. . راس الفساد والعار
فرحتنا.. زادت قوتنا
لكننا لسة ماتوهناش
عارفين بان الفساد والظلم هنا موجود
ومسكتناش
لسة الميدان موجود
والفرق عن البداية.. .إن العدد هيجود
وان فضل الفساد والظلم راح ننزل ومن تاني
ودا لأنى.. .فى الميدان فاكر مكاني
فى الميدان سندى وايماني